Sundlaugin

Frábær sundlaug fyrir alla, draumur fyrir barnafólk.
Sundlaugin er 25 x 8,5 metrar að stærð, tveir heitir pottar, vaðlaug, kalt kar og tvær stórar rennibrautir og mikið af skemmtilegum leiktækjum og leikföngum.

Umhverfisvænar lausnir notaðar í sundlauginni. Klór er framleiddur á staðnum og er matarsalt eina afurðin sem þarf í framleiðsluna ásamt rafmagni og vatni. Framleitt er klórgas og það sett beint inn í sótthreinsun auk þess sem kerfið framleiðir klórvatn sem notað er til að mæta dagssveiflum í notkun. Tækið er það fyrsta sinnar tegundar hér á landi. Helstu kostir nýja kerfisins eru: Enginn flutningur á milli staða á hættulegum efnum, klórlykt minnkar, sviði í augum minnkar verulega, húðerting minnkar, vistvænt fyrir starfsfólk og stuðlar að umhverfisvænu umhverfi.

Almennar umgengnisreglur laugargesta

• Börnum undir 10 ára aldri er óheimill aðgangur að sundlaug nema í fylgd með syndum einstaklingi 15 ára eða eldri. Ekki er heimilt að hafa fleiri en tvö börn yngri en 10 ára með sér í sund nema um sé að ræða foreldri eða þann sem fer með forsjá barnanna skv. lögum. Ber viðkomandi að gæta öryggis barns/barna sem hann hefur í sinni umsjá á meðan þau eru í eða við laug. Miðað er við 1. júní árið sem barn verður 10 ára.
• Börn mega fara ein í sund eftir 1. júní árið sem þau verða 10 ára.
• Þar sem hópar barna undir 10 ára aldri eru saman komnir skulu ekki fleiri en 15 börn vera í umsjá hvers leiðbeinanda, sem er ábyrgur fyrir hópnum, og gæslumanna lauga.
• Til að auðvelda kennara eða ábyrgðarmanni hópa að fylgjast með hverju barni skulu hópar barna sérstaklega auðkenndir með áberandi lit á armbandi/sundhettum.
• Fyllsta öryggis skal gætt þegar komið er með hóp af börnum og unglingum í sund. Forráðamenn hópa kynni sér reglur sund- og baðstaða og aðstoði starfsfólk við gæslu.
• 6 ára og eldri þurfa að nota baðklefa merkta viðkomandi kyni.
• Fólki undir áhrifum áfengis eða annarra vímuefna er ekki leyfður aðgangur að sundstaðnum.
• Öllum laugargestum er skylt að þvo sér með sápu án sundfata áður en gengið er til laugar.
• Notkun tyggigúmmís er óheimil í sundlaug.
• Öll óþarfa háreysti í búningsklefum, böðum og á laugarsvæðinu er bönnuð.
• Notkun köfunartækja s.s. öndunarpípu og köfunargrímu, sem ná yfir öndunarfæri er bönnuð, nema með sérstöku leyfi laugarvarða.
• Dýfingar af langhliðum og bakka í grynnri hluta laugarinnar eru bannaðar.
• Dýfingar í barnalaug eru stranglega bannaðar.
• Laugargestum sem hafa í frammi kaffæringar, skvettur og ólæti má vísa úr laug.
• Ekki eru leyfileg stærri flotleiktæki, í eigu sundgesta, s.s. vindsængur, uppblásnir bátar o.fl., nema með sérstöku leyfi laugarvarða.
• Sundlaugin tekur ekki ábyrgð á verðmætum s.s. skófatnaði, fatnaði í skápum, körfum, á snögum búningsherbergja eða í útiklefum, eða öðrum verðmætum sem gestir kunna að hafa með sér.
• Laugargestir skulu í öllu haga sér eftir þeim fyrirmælum sem starfsfólk laugarinnar gefur.
• Öll ljósmyndun í og við sundlaug er háð leyfi forstöðumanns Íþróttamiðstöðvarinnar á Blönduósi.
• Farsímanotkun gesta er bönnuð í klefum og á laugarsvæði

Þreksalurinn

Þreksalurinn er bjartur og glæsilegur. 
Hann er búinn góðum Technogym líkamsræktartækjum. Að auki er innréttuð sérstök aðstaða fyrir lyftingamenn á svölunum í íþróttasalnum sem einnig velbúinn með boxpúða, lyftingargólfi, upphífingarstöng o.fl.

ATH: Yngri en 15 ára er ekki heimilt að vera í þreksal. Þó má 9. bekkur fara í þrek eftir að hafa fengið tilsögn hjá íþróttakennara.

Íþróttahúsið

Íþróttasalurinn er 23 x 40 metrar að stærð sem er löglegur handknattleiksvöllur, 4 blakvellir, 6 badmintonvellir, 3 körfuknattleiksvellir og 1 tennisvöllur. Einnig er mikið úrval tækja og áhalda til íþróttakennslu. Góð áhorfendastúka í salnum.

Hægt er að leigja íþróttasal til íþróttaiðkunnar eða undir margskonar viðburði.

Myndir

Verðskrá